منتديات الختمية تشاطر آل شيخنا ود ابراهيم الابكراوي الأحزان..

06-19-2021, 05:35 PM	#1
Ya Mirghani مدير عام	منتديات الختمية تشاطر آل شيخنا ود ابراهيم الابكراوي الأحزان.. أنا : Ya Mirghani سجل معنا لتتمتع بهذه الخاصية إيماناً بقضاء الله وقدره ننعي الشيخ إبراهيم ود شيخنا أحمد ود ابراهيم الابكراوي.. الذي حدثت وفاته فجر اليوم بالقاهرة... لا حول ولا قوة الا بالله العلي العظيم.. نسأل الله له الرحمة والمغفرة والقبول الحسن وأن يعوض شبابه الجنة ويجاوره بسبطي النبي الأعظم سيدي الإمام الحسن وسيدي الإمام الحسين في عليين ياااارب.. صادق تعازينا لمولانا السيد محمد عثمان الميرغني مرشد الطريقة الختمية وزعيم الإتحاديين ولانجاله الكرام ولشيخنا تاج السر ود ابراهيم الابكراوي وجميع آل الابكراوي بالاراك وام بدة والامارات...

06-21-2021, 10:17 AM

سراج الدين احمد الحاج

المُشرف العام

سراج الدين احمد الحاج is on a distinguished road

رد: منتديات الختمية تشاطر آل شيخنا ود ابراهيم الابكراوي الأحزان..

أنا : سراج الدين احمد الحاج

سجل معنا لتتمتع بهذه الخاصية

اللهم اغفر له وارحمه واسكنه عالى الجنان
صادق تعازينا لمولانا السيد محمد عثمان الميرغني مرشد الطريقة الختمية وزعيم الإتحاديين ولانجاله الكرام ولشيخنا تاج السر ود ابراهيم الابكراوي وجميع آل الابكراوي بالاراك وام بدة والامارات...

عزيزنا الزائر لن تتمكن من مشاهدة التوقيع إلاَّ بتسجيل دخولك
قم بتسجيل الدخول أو قم بالتسجيل من هنا

06-22-2021, 04:58 PM	#3
Ya Mirghani مدير عام	رد: منتديات الختمية تشاطر آل شيخنا ود ابراهيم الابكراوي الأحزان.. أنا : Ya Mirghani سجل معنا لتتمتع بهذه الخاصية بسم الله الرحمن الرحيم وبه الاعانة بدءا وختما وصلى الله على سيدنا محمد ذاتا ووصفا واسما قال تعالى { يَٰٓأَيَّتُهَا ٱلنَّفْسُ ٱلْمُطْمَئِنَّةُ ، ٱرْجِعِىٓ إِلَىٰ رَبِّكِ رَاضِيَةً مَّرْضِيَّةً ، فَٱدْخُلِى فِى عِبَٰدِى ، وَٱدْخُلِى جَنَّتِى} صدق الله العظيم الشيخ تاج السر احمد ود ابراهيم واخوانه و ال الشيخ ود ابراهيم الابكراوي وآل الدافراب وآل السالماب وآل الزغولة والأهل بالاراك والكرفاب وانسابهم واصهارهم ومريديهم يتقدمون بخالص شكرهم لمولانا السيد محمد عثمان الميرغنى والسيد الحسن الميرغنى والسيد جعفر الميرغنى والسادة المراغنة والسيد محمد الادريسى والسيد الحسن الادريسى والسادة الإدارسة والسيد معتصم العجيمى والسادة العجيمية و السادة مشائخ الطرق الصوفية وأتباعهم والسيد سفير الإمارات العربية المتحدة والسيد سفير المملكة العربية السعودية وكل الاهل المريدين بولاية الخرطوم وكل ولايات السودان والسادة خلفاء الطريقة الختمية بالسودان والأهل بشندي أبناء الخليفة جعفر الأمين عمر بقيادة ابنهم الخليفة طه عثمان العوض والاهل بالولاية الشمالية عامة لتكبدهم المشاق ومشاركة الاسرة فقدهم الجلل الشيخ إبراهيم أحمد محمد ابراهيم الابكراوى ولكل من ابرق واتصل معزيا من كل دول العالم والخليج سائلين الله أن لايريهم مكروها في عزيز لديهم وانا لله وانا اليه راجعون

06-22-2021, 09:45 PM	#4
Ya Mirghani مدير عام	رد: منتديات الختمية تشاطر آل شيخنا ود ابراهيم الابكراوي الأحزان.. أنا : Ya Mirghani سجل معنا لتتمتع بهذه الخاصية ياسلااااام...يا لطيف ...وشن القول وكت تصمت حروف الفرح وينجابق قصب الجروف اللخدر الشارب من النيل والنز ممطمط جذورو. ومالا الايام مالت علينا وربطت حلبتا فينا والاحزان دي قدر ما اتفلفصنا منها وشادقناها برضو لوت ضراعنا والليلي بس تف قطعت ايدنا اليمين من حد الكتف حتى ما خلت فيها الكدر...ما كتير على ربنا ولاهو غليد على الموت ابدا الا فقد ابراهيم ابن الشيخ أحمد الابكراوي والله فقد عظيم.وعلى غير العاده المتبعه في البلد ركب التاريخ صايح عديل وانتكت قبة مشايخو واترخت وبكت بكاء وناحت نواح وساقة الكزامه قالدت ساقةابكراوي وكلهن متحزمات ورابطات الجريد في نصهن وطقت تكتوك الزغاريت وردحت رديح وكل السواقي من ضيقة ود حماد لي حجر الحجير اتنهدبن وكل السواقي الباقي فتحن بكاهن في محلهن والدائم الله الفاني خلقو وقبل يومين كانت فجيعة تاريخ البلد العم الجاسر الحافظ اسرار اللراك وعارف البلد شبر..شبر والليلي جاء وساق ولد مشايخو معاهو الولد الرقيييق الطييب العطوف والمحبوب شرق وغرب وكان سخي سخاء السحاب...فقد عظيم وفقد جلل والدائم الله سيد العرش وربو العظيم واحر التعازي لكل اهل الاراك وكلهم ارحامو وعضامو والتعازي لقبيلة الختميه في جميع انحاء السودان وكل اهل الاراك البكاء حقهم والعزاء يلزمن...كل المريدين في كل القرى واهل المسائد واهل النوبات والذكر...من ابكر لي كاسنجركاسنجر حاج الماحي شرق وغرب العزاء حقهم...ياريت لو لقيت حروف ارصها وامغها وتطول ومهما تكون ماب تقدر تعبر عن الفقدالجلل...ياسلااام رحم الله الشيخ ابراهيم احمد ابن مشايخنا الكرااام ابناء الشيخ ود ابراهيم الابكراوي...سهل عثمان علي سعيد

06-22-2021, 09:51 PM	#5
Ya Mirghani مدير عام	رد: منتديات الختمية تشاطر آل شيخنا ود ابراهيم الابكراوي الأحزان.. أنا : Ya Mirghani سجل معنا لتتمتع بهذه الخاصية بسم الله الرحمن الرحيم يايتها النفس المطمئنة ارجعي الي ربك راضية مرضية فادخلي في عبادي وادخلي جنتي وبه الاعانة بدءا وختما وصلي الله علي سيدنا محمد ذاتا ووصفا واسما الحمد وكفي والصلاة علي النبي المصطفي والحمد لله القائل في كتابه العزيز وما كان لنفس ان تموت الا باذن الله كتابا مؤجلا والقائل كذلك كل نفس ذايقة الموت والذي خاطب نبيه وحبيبه وصفيه وسيد كل نفس انك ميت وانهم ميتون كتب علي ذاته العليه البقاء وكتب علي مخلوقاته الفناء فالموت ايها الاحباب مصير كل حي طال الزمان اوقصر وهو الرحلة الكبري والاقامة الدائمة التي يحكم فيها احكم الحاكمين فلا معقب لحكمه ولا استئناف ولا استعطاف ويحضرني قول الصحابي الجليل سلمان الفارسي رضي الله عنه حيث قال ثلاث اعجبتني حتي اضحكتني مؤمل الدنيا والموت يطلبه وغافل وليس يغفل عنه وضاحك ملء فيهولا يدري اساخط عليه رب العالمين ام راض وثلاث احزنتي حتي ابكتني فراق الاحبة محمد وصحبه وهول المطلع والوقوف بين يدي الله ولا ادري الي الجنة يؤمر بي ام الي النار ويحضرني كذلك في هذا الموقف الحزين مقال سدنا جبريل عليه السلام لسيد البشر عليه اتم السلام والاكرام من الملك العلام احبب من احببت فانك مفارقه وعش ما شئت فانك ميت واعمل ما شئت فانك مجزي به واليوم يعتصرنا الالم ونحن في حضرة المربي الجليل شيخنا تاج السر وقد اصابت النفوس الدهشة والوحشة لرحيل شقيقه شيخ ابراهيم الذي لم تمهله الايام هذا الرجل الخلوق المهذب المحترم ذرية القوم الصالحين كان يحمل في قلبه ودواخله قلبا ودودا صافيا لا يحمل غلا ولا حقدا علي احد سمح السجايا حميد الخصال طيب المعشر والسيرة والسريرة ان حدثك لا يحدثك الا بصوت خفيض ونحن اذ نعزي انفسنا اولا وال ود ابراهيم جميعا واهل الاراك واهل الطريقة الختمية والطرق الصوفية في هذا الفقد الجلل ولايسعنا ان نرفع اكف الضراعة الي رب كريم اللهم ان عبدك ابراهيم قد جاء اليك من سعة الدنيا الي سعة رحمتك فاكرمه يا رب العالمين اللهم ارحمه واعف عنه وعافه واكرم نزله ووسع مدخله ونور قبره ونقه من الذنوب والخطايا انزل علي قبره الضياء والنور والفسحة والسرور اجعله في صحبة نبيك والصديقين والاولياء واهل البيت والصالحين من عبادك يا رؤوف يا رحيم يا حليم كريم لا تحرمنا اجره ولا تفتنا بعده واجعل البركة في احفاده واحفظهم واهله وجيرانه واحبابه ومريديه اللهم اجبر كسرنا جميعا في هذا المصاب الجلل ولانقول الا مايرضي ربنا انا لله وانا اليه راجعون... باسم روابط الختمية بمناطق تنقاسي وابورنات شرف الدين النضيف

06-22-2021, 10:14 PM	#6
Ya Mirghani مدير عام	رد: منتديات الختمية تشاطر آل شيخنا ود ابراهيم الابكراوي الأحزان.. أنا : Ya Mirghani سجل معنا لتتمتع بهذه الخاصية مرثية الاخ ابراهيم احمد رحمه الله .................... احمدك ٱكريم حار الجمر فى عفصو. ابراهيم رحل قبال يكمل درسو. بي وراكه اللراك توب الحداد شال لبسود تقول عارف التمر موتك وحرق نفسو. .................... يامن دي المصيبه الليلى وقعت فوقنا. اتحرق تمرنا واتكسر واسوقنا. الذوق والادب هيل الرحل بي فوقنا. تانى بلاهو وين تعمر مجالس سوقنا. .................... ابراهيم اقيف فايتنا وين بي سرعه. اتفتقن جروح ماظنو تنفع رقعه. ياابونفسا سمح من المثانى السبعه. علي السموك عليهو والله نفس الطبعه. .................... مالك يازمن كل يوم تجيبلك محنه. ابراهيم صغير يادابو بيهو فرحنا. ياريت النفوس تتقدى نفديك نحنه. عشان فى كل شي انت بتكون فالحنه .................... يامصر السواد جاك ماشي بي كرعيهو. جاك طالب العلاج جنازه رجعتيهو. لومادي القسم وحكم الاله باريهو. حرم فى قضيتوالقاهره مابتفديهو. .................... يامصر السواد الكنته بفخر بيكى. جاك طالب العلاج ليه روحوفاضت فيكى. لو مادا القدر والله مابخليكى. ماكى قدر ولدنا انتى والحواليكى .................... ان مشه في الارض ماهو المشى ابو كتاحه. التقى والصلاح والله لابسو وشاحه. فزاع البكورك مهرو فالحى فلاحه. بي وراهو البلد قلبت غناها مناحه. .................... مابتلقاهو فى نص الرجال ومدنقر. ومابتلقاهو فى مجلس رزيله مصنقر. مابتلقاهو فديوم بالهموم متغير. يحترم الكبير والجاهل معاهو صغير .................... مابقدر اقول فوقك واطيع حرفى. مانى بليغ كلام جاهل قليل العرفي. مهما قلته فيك القاهو ناقص وصفى. قدر العندي قلتو والباقى دين فوي كتفى. .................... وين قيلته وين امسيته باابراهيم. خليته البلد تنخج رجال وحريم. سالتك ياكريمياذوالجلال ورحيم. طاقه من الجنا يكرف رحيق ونسيم. .................... ٱلاف السلام ليكه انته وابوكه. عمك وجدك الكان بالعفاف ربوكه. تغشاك فى قبيرك من خلوق حبوكه. تلقاك فى نعيم والجنه ليك مبروكه. .................... العاقب احمد على وداللراك

إهداءات ^^^ ترحيب ^^^ تهاني ^^^ تعازي ^^^ تعليقات ^^^ إعلانات

الذين يشاهدون محتوى الموضوع الآن : 1 ( الأعضاء 0 والزوار 1)

منتديات الختمية تشاطر آل شيخنا ود ابراهيم الابكراوي الأحزان..

المنتدى العام