مُنتديات الختمية - صحن الصينى 0 شعر فى عازه

عازه من يوم تسعة تبكى - وتزرف الدمعات غزيرى
حليلو صحنى الكان مشجّر - وكت عليهو دوام دبيرى
انزلق راح كيف منى دحدر - واتشرملو شرمةً كبيرى
التويب أبزيق كان مسطّر -شرطو نص واتلفتبو ميرى
شعرى كيف كان ناعم مضفّر -اتنكش واتمزعت ضفيرى
وحت سماى الكان قيمو يمطر - اتقسم وأضحيت فى الهجيرى
كوركت بلحيل بقى صوتى أشتر - مافى زولاً جايب خبيرى
ياما ناس كان بعشقونى - هاموا بيى انا من صغيرى
قدموا أرواح مهر فينى - قبل مايربطو الحريرى
مالقو الدايرنو منى - أبقى واحدى أظل كبيرى
كنت قايلى وكان فى ذهنى - وحدى انا البختار مسيرى
بى سياسات فصل جونى - حدداً تقرير مصيرى
وحدتاً خاب فيها ظنى - فى دريبا فقد عميرى
انتى يامريكا أبعدى منى -بينا وين داير تسيرى
خلى ربنا يرضى عنى - وألقا يوم مرتاح ضميرى