القبول يا رب - شباب الطريقة الختمية بدائرة ود ابراهيم بأم بدة
مجموعة مدائح ختمية.. شباب الطريقة الختمية بمسجد السيد علي الميرغني ببحري
|
|||||||
| المنتدى العام لقاء الأحبة في الله لمناقشة جميع المواضيع |
إهداءات ^^^ ترحيب ^^^ تهاني ^^^ تعازي ^^^ تعليقات ^^^ إعلانات |
|
|
|
أدوات الموضوع | إبحث في الموضوع | انواع عرض الموضوع |
01-20-2025, 02:46 PM
|
#1 |
|
مدير عام
 
 |
أراك ود سورج.. إستراحة مع الشاعرة بت اد خير وذكائها الفطري...
#أراك ود سُورج✌️🇸🇩 إستراحة مع الشاعرة بت اد خير وذكائها الفطري😍😍 من أجمل ما سمعت مؤخراً ونحن معطونين فرح اليومين دي بإنتصاراتنا المتتالية من شمال دارفُور والجزيرة والخرطوم بحري وغرب أم درمان وجنوب الخرطوم، مناقشة كانت أول أمس مع الأُستاذ أيوب محمد الحاج في قصيدة حبوبتُو بت اد خير يُمة أريدِك عِقد الكنار... والقصيدة دي عملتها الحاجة بت اد خير تمدح فيها بنتها سِت نُور الصغيرة آنذاك وتمجِّد في فضائلها اللِّي لا تُحصى ولا تُعَد وأولها وآخرها: 👇 يا امْ خشيماً ما قال وقال ومن فريق ما جابْ لِي النِقال.. طبعاً أكثر ما يعظِّم البنت ويجللها ويكسيها وقار هُو التَقَلَة التَقَلَة التَقَلة.. وعكسها الخِفِّي نسال الله السلامة... بعد داك أيوب سرح لي في القصيدة دي لامِن إتكيَّفت في حناني ذاتُو.. عشان كدي قُلت أبسطكم معاي... البنت دي شِدَّة ما كانت عاجبة أُمها تخيَّلت أن جاء لخِطبها العُمدة طه ود سُورج بي جلالة قدره وما أدراك ما هُو... قالت شنو: 👇 طه ود سُورج فُوقنا جال... وقال لي إنتي اللِّيكي الخيار... وزيادةً في مقدار البنيَّة الفنجرية.. قال ليها تختاري دايري ياتُو في أولادي عُمد المُستقبل... شُوفُوا بالله العظمة دي... دايْرِي في الجِنيات الكُبار.. ولة دايْرِي الجِدُّو كمبال قال لي إنتي اللِّيكي الخيار.. قُتلُو دايري الجدُّو كمبال طبعاً القافية، وهي شاعرة مُجيدة بحُسن نية جابت الخيارات الفوق دي... فرِحت بت السادة الكوارتة بأن الخيار وقع على إحدى أبنائها عُمد المُستقبل وهُم للتوثيق حسن، الأمين، الخليفة طه سورج... ركِبت أُم الجِنْيَات الكبار وكانت من جيرانها عنيناب حزيمة، وجاتها في مقاشي... ودا يورِّينا قيمة الشُعراء ومهابتهم في ذلك الزمان... قالت لها إنتي آ يُمَّة تخلِّي ولاد طه ود سُورج الكُبار، وللتوثيق هُم: عثمان، محمد "ناظر الخط مستقبلاً"، جعفر، أحمد، علي الشيخ طه سورج، وتخطبي من الصغار؟؟؟ فعشان تطيِّب ليها خاطرها وتمرق من حكاية القافية ومُو القافية والقِرْقِرْ الكتير داك... إستخدمت ذكاء فطري بمهارة فائقة، أول حاجة نكرت البيت دا حطب.. قالت ليها أصلي ما جبت سيرة البيت دا فوق خشيمي دا... وطوَّالي قطعت أخضر، قالت ليها أنا كلامي القلتُو ياهُو دا: 👇 قال لي في الجِنْيَات دايري ياتْ قُتلُو عثمان فالح الجِنَات.. إنبسطت أُم عُثمان، ضحكت، شربت معاها القهوة ورجعت مجبوووووورة الخاطر... رحم الله كل من ذكرنا بعاليه -العُمدة ذائع الصيت- الذي كان لا يُظلم بمجلسه أحد طه ود سورج وناظر الخط من بعده محمد ود سورج وآلهم جميعاً.. ورحم الله بت كمبال أم العُمد الصغار وبت العنيناب أم العُمد الكبار.. ورضي الله عن الحاجة بت اد خير ورفع الله درجاتهم جميعاً مع آبائنا وأُمهاتنا في عليين.. وعشان تستمتعوا بالمظبوط.. تابعُو الفيديو المُرفق بصوت حفيدها أيوب محمد الحاج حفظه الله ورعاه💛❤️ تحياتي... كتبه: جمال أحمد الحسن في يوم الأحد 19 يناير 2025م |
|
|
| مواقع النشر (المفضلة) |
| كاتب الموضوع | Ya Mirghani | مشاركات | 1 | المشاهدات | 2509 |
|  |
| انشر الموضوع |
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
العرض الشجري