[سراج الدين احمد الحاج]

من بربر-القدواب-عبد القادر بطران يرثى الشيخ محمد الامين ود الفكى على





بسم الله والدوام لله الفرد الصمد الفى حكمه مايشاور ولايشرك احد
جينا نعزيكم فى مولانا الشيخ محمد الفقيه الورع للمحتاج سند
وربنا ينزل بركته محل مااتولد

القدواب يبكيك ياصاحب الدين والعلم القدواب ينعاك والجميع صابه الالم
ونبكى صاحب المساجد والخلاوى والقلم صاحب الكرم والعفو والحلم
فقدنا شيخاً كان فى بلدنا شامخ علم

نعزيكم ونفوسنا معاكم نعزيها دا رباى اليتامى والعريانه يكسيها
يقدم باليمين من شماله يخفيها زاهد الدنيا مو داير نعيم فيها
الى جنة الفردوس بى حورها وجواريها

من القدواب جينا نعزى ونجابر الاهل مكلوميين وحزنانيين فى المصاب الجلل
اصله العمر مكتوب ومقدر فى الازل ياالله الزمنا الصبر وحسن العمل
وفيه ود بطران جاب ابيات يمثل مثل

نحن فى القدواب اياك شيخنا وابونا مربوطين من جدودنا نعرفكم وتعرفونا
فى افراحنا واحزانا تصلوا وتجاملونا ونحن شيخنا بنبكيه وقلوبنا محزونا
ونحن الاهل وانتو التجو تعزونا

الله يرحمه كان طيب السلوك والمعشر ركازة الضعيف الفى ضيفه ماكشر
ساعة الحارة تلقاه فى كل الجهات منشر اسداً مابيخاف خماد الشبك والشر
واصله الموت معروف ياخد خيار البشر

مامات شيخنا ترك العلم والاخ والولد وذكراه بالخير عامه فى كل البلد
وببركاته وكراماته واحسانه دائماً مخلد واعماله الصالحات كتير لاحصر لاعد
الى جنة الخلد ياشيخنا مكرم ممجد


خمسة أعوام تمر على رحيل شيخناالجليل وخليفة ابواته الشيخ محمد الامين رضى الله عنه
ونور ضريحه والدمعة جارية منهمرة طيلة هذه الاعوام الخمسة ..والقلب منفطر والحزن عميق
وعميق جدا ..لكن عزاءنا اخى الحبيب ( ابو نورة)..شيخنا يمانى رضى الله عنه وارضاه
موجود بيننا وانواره وكرماته ظاهرة باهرة ..نسال الرحمن ان يبارك له الايام ..( والبركة مابتروح التراب)
وحقيقةً يعجز اللسان عن التعبير وتقف الكلمات حائرة عاجزة ..نسال الله ان يجعلنا معهم فى الدارين ..
ولك صادق محبتى وودى بلاحدوووود ...

عثمان عوض الكريم معجب بهذا